طال السهر والعين تبغى المنامي

ياليل ياليل الشقا ويش تاليك
طال السهر والعين تبغى المنامي
زاد السواد اللي يغطي معانيك
حيرتني يالليل مدري علا مي
اشكي عليك الحال مرات واشكيك
مره نديم القلب ومره حرامي
وازعل عليك أوقات وارجع واراضيك
واعيش بك بين الصور والأسامي
وارتاح بك يالليل واغلي ثوانيك
وابعثر الونات وسط الظلامي
وانظم لك نجوم السماء عقد واهديك
واسري الهاجوس شرق وشامي
لامن غفت عين البشر جيت اناجيك
ثم قمت اجاوب نوح ورق الحمامي
من صاحبٍ يالليل مثل القمر فيك
خلٍ سكن بين الحشا والعظامي
والقلب عاف اليوم هذي وهاذيك
ماكنه الا عن هوى البيض صامي
لاقال ابي فرقاك ولاقال شاريك
كنه يمرجحني بسلك الغرامي
ياصاحبي كانه تغلي أنا اغليك
حرا م ماحيت غيرك حرامي
حكم القدر ساق القدم يم اراضيك
اطرد سراب الصيف والصيف حامي

تبدي غرامك لي من دون تشكيك
والعين تسهرلك ورمشك ينامي
الله وكيلك كل ماحل طاريك
كن الدقيقه من جفا الوقت عامي
لبيه يارمشك وعينك واشافيك
ولبيه يانبرات حلو الكلامي
ولبيه ياطيف يجيبك ويدنيك
ولبيه ياعشقي وغاية مرامي
ليتك تحضن القلب بشويش بيديك
وتبل قلبٍ يابس الريق ضامي
أنا الضما جيت ارتوي من سواقيك
والا البحر مابل ريق الضوامي
ولاتحسبني لاقسى الوقت ابرجيك
والله ماينزل عشانك مقامي
بعيش في ذكراك وارحل واخليك
واحفظ مقامي هيبتي واحترامي
ماعشت ياراسي على شان اوطيك
دون المذله حد سيف الحسامي
أنا عطيتك كاش لاترد لي شيك
هات الجواب وخل عنك التعامي
والله يجازي الليل والله يجازيك
اسهرتني واحرمت عيني منامي

موالي الحْزن لا تشرَه على اهدابي
ـــــــــــــــــــــــــ ما فيه وجه ٍ فقدته فيك ما جاني

البارحة والمكان يضجّ بآحبابي
ـــــــــــــــــــــــــــــ كنّ المواقف على دمعي تحداني

طلّت سماهم عليّ وطارت اسرابي
ـــــــــــــــــــــــــــ واحترت لأيّ الغيوم ترفّ جنحاني

مملكة الهدوووء

صح لسانك على روعة الطرح

رووووووعه وصح لسانك

ما هذا الكلام والعتب الموجه الى الليل !!! انه عتب صديق لصديقه ..
هكذا ناغيتِ الليل يااا مملكة الهدوء.. وبكل هدوء ..
أجدتِ المناغاة والعتب له ..
اسمى التحايا لكِ مني .. وامنيات دائمة ..

مناغاة لطيفة جدا وبهدوء مع الليل والسهر
ياااااا مملكة الهدوووووء .. سلمت الايادي التي كتبت ..
وسلم لنا البوح الراقي ..
اسمى التحايا وارق الاماني لكِ ..