من هور العمارة الى اهل الانبار الكرام$$

أشما دار الزمان وبعد خل يندار
يظل مرسى السفينة عد أهل الانبار
مضايفهم زهيه وعامرة الدلات
وعزيمتهم ذهب ما يعرف الزنجار
أهل نخوة أعربية والكرم والجود
لأن كلهم شهامة ازغار وية أكبار
ليوث وبالمواقف الهم ألف أحساب
وإذا عايل سحكَها الكَاع تجدح نار
تعال انشد عليهم ثورة العشرين
مكَوار الزلم خلة الدرك طشار
ومن شافوا عراق الخير طاح بضيج
سووها ملاحم والدموم انهار
اذيابة الخلو أمريكا صفت خرفان
وردوها الاباشي امكَبعة بالعار
منبعهم أصيل ويشهد التاريخ
سيوف أمجربة بركَاب كل غدار
رجال اتحزمو لجل الشرف بارود
موم مثل التحزمة أمريكا بالدولار
طبع بيها الشهادة أدور الزينين
وتعوف الجبان وتاخذ الأحرار
حي الله الرجال المايكضها الموت
وحي الله الشهيد الطاح والثوار
وحي الله المضيف الماطفت ناره
كرم حاتم طبعهم مايرد خطار
من هور العمارة والكَصب والزور
اهديها القصيدة من الكَلب تذكار

والنعم والف باهلي في الانبار

صح لسان من قالها

وسلمت يدك على القصيده الجميله